Բաղադրիչներ
- Հավի միս - 1.5-2 կգ
- Անի թթվասեր - 500 մլ
- Թարմ համեմ - 1 փոքր փունջ
- Սխտոր - 2 ատամիկ
- Գոլ ջուր - 150 մլ
- Բուսայուղ- 30մլ
- Աղ՝ ըստ ճաշակի
- Խմելի-սունելի - 1 թեյի գդալ
Պատրաստման եղանակ
Այս ախորժելի ուտեստը կարելի է պատրաստել ինչպես ամբողջական հավից, այնպես էլ՝ հավի փափկամսից (դոշի միս), բդիկներից կամ թևիկներից: Եթե հավն ամբողջական է, նախ կտրատեք այն միջին չափի կտորների, լավ լվացեք և թողեք մի քանի ժամ թեթև աղաջրում:
Հետո, տապակի մեջ տաքացրեք քիչ քանակությամբ բուսայուղ և տապակեք հավի կտորները բոլոր կողմերից՝ մինչև ոսկեգույն, գեղեցիկ կեղև ստանալը: Տապակման ընթացքում ավելացրեք միայն աղ՝ ըստ ճաշակի:
Սոուսի պատրաստում
Թարմ համեմի տերևները մանր կտրատեք (պոչերը հեռացրեք՝ դառնությունից խուսափելու համար), իսկ սխտորը մանրացրեք քերիչով: Թթվասերի մեջ ավելացրեք 150 մլ գոլ ջուրը, 1 թեթև թեյի գդալ աղ, խմելի-սունելի, մանրացրած համեմն ու սխտորը: Լավ խառնեք, որպեսզի բոլոր բաղադրիչները միաձուլվեն:
Տապակած հավի միսը թողեք մի փոքր հովանա, ապա տեղափոխեք սոուսի մեջ: Թողեք 2-3 ժամ, որպեսզի միսը ներծծի սոուսի համը:
Մատուցում
Այս համեղագույն կերակուրը կարող եք մատուցել՝ որպես ինքնուրույն ուտեստ կամ խավարտ՝ ցանկացած փլավի կամ կարտոֆիլի հետ: Այն անպայման կգրավի ձեր ընտանիքի և ընկերների սրտերը:
Բարի ախորժակ: